日日實驗倉(31/10/2022)
2022年10月31日
.JPG)
正如之前的設置，
1. EMA 200 以上，只買不沽
2. 以Donchian(16)的上Bar 作為入場
3. 以60 點止蝕，70點作目標
政治同經濟，由於大部份人都係64% 社會被欺壓的人，沒有誰比誰好。大部份人都係媒體接收資訊，有錢人同埋消息人士一早入好貨，早一步同遲三步唔會有乜分別。
世界的20/80, 今日有D 時間，可以再講下。
20% 的人擁有80% 資源。千祈唔好睇咁多台灣勵志書，真係會睇到人變蠢。唔係20%人會堅持，又或佢地真係好努力，以及佢地好細心。
堅持 + 努力 + 細心 ，都係老闆喜歡你的時候，你做乜都要搵借口去讚你的理由。如果身邊仲有人信自己真係好OUTSTANDING 而得到上司加持，我唔會否定你，但你一定唔會係我朋友。唔好咁天真，努力同肯蝕底唔會得到應有的。高志森成功之後同世界所有人講，佢出電影頭十年無加過人工，然後繼續好認真工作。呢個世界大把人十年無加過人工，然後好認真咁做一份工。
至於踩人上位，仲笨柒。如果老細本身喜歡你，你唔使踩人，大把好處都係借頭借路塞俾你。試過大把老細用公數買完D 野，話無人用，然後塞俾人。你唔係信老細真係會買錯野呀？至於老細本身唔喜你，你走去咬人，同埋四處點火頭去告發其他人。老細可能會扮恍然大悟，覺得你好到POINT，叫你以後見到要話佢知。
作為一個中資老細，扮失憶，同講左唔認，係必要技能。牙齒當金使，只係對客。每次升職都話下個到你，梗係咁講架喇。明明你都唔係讀果科，都話其實你只要英文好少少，又或進修下就有份。然後指住樣板同事「拿，呢個就係成功樣板，因為佢實在太努力，所以未畢業都升住先。」佢要錫你，你得中五都扶到你做正經理；佢唔錫你，你做埋經理果份，都只係經理放假果陣署任一個星期，再俾少少津貼你做狗糧。
拿，唔係放負，亦唔係叫人躺平。只係篤人呢樣野，真係損人不利己。職場政治呢樣野，本身係無底深淵，唔係深潭。做老細隻耳，做老細隻眼，講事實都已經好辛苦。加鹽加醋，整到有色有味，老細就可能要你做埋刀手，幫佢移除頂心頂肺果個。回報會係成為老細心腹？NO。老細會俾多D 錢你的原因，只會因為你可以响出面搵到另一份工係可以有多過而家。市場就係咁樣運作，你有能力响其他公司有更高人工，响原有公司就會有挽留。
社會 4/16/16/64結構响有農業果一刻已經注定。
畢竟响「4」呢一格，都仲有分「0.8/3.2」，果64% 資源都[51.2/12.8]。0.8% 的人坐擁51.2%資源。
你老細如果係呢0.8%，都或者值得用心服待下。如果唔係，其實收幾多人工，做返幾多野就好好。有時間就經營下自己個投資PROFILE，唔好ON99一味覺得買樓收租，再用份租去供樓。
留言