好好笑的索取家用(一)

2022年10月14日，見到有D 求職報章有D 初出社會年輕人俾老母壓迫故仔，作為過來人無乜營養咁寫下野。平時我成日講人地D 野，講下我自己野。

由於當年老母都係堅離地，我好早已經踏足社會。原因在於1992年開始HK 人工升了，1985年屋企買落果層居屋，老母月薪600但月供2000；去到1992年之後，月薪已經4000，就提早贖樓了。提早贖樓之後，老母將1985-1992年期間的緊縮經濟方法，延續並以更誇張的形式去儲蓄，準備購買第二間屋。1992年開始就實施了70%月收入儲蓄方法，在收入沒有增加的情況下，在日常的伙食及書簿費扣減。

1992-1994年，由於升中前的呈分，佢唔想買書，但佢想我升到秦石邨29A號果間天主教中學。原因係「佢以為」以及「佢地兩公婆以為」只要阿哥入左果間中學，個細佬就算幾廢都可以直系親屬原因升上去。但呢個情況，只有部份小學有呢個POLICY。結果就出現了，三個家長出一份錢，夾錢買一份書的大計。當年我讀上午校，有一個成員就係下午校，仲有一個成員(阿基，因為呢條友會响以後的故仔出現，以後簡稱阿基)係低我地兩個一年級。

我上午放學將書交予下午校的隊友，下午校的隊友放學之後，會搵我一齊做功課，然後翌日上學我就拎住呢D 道具返學。既然資源咁緊張，總會有時下午校隊友俾唔切書我，我之後果日就會被記錄欠帶書。我响高小的時候有大量欠帶書欠交功課而記好鬼多缺點。

咁阿基個老母夾錢，佢個仔就會响我地升班之後，用1/3的價錢有一份書。而且，仲開口埋口自己個仔好蝕底，所以我地兩個家長都會將過氣考試卷同埋過氣功課俾鳩埋阿基。就係因為咁阿基由小三開始就遠遠拋離其他同學，因為條友每日D 功課只需要照抄，多出的時間就淨係煲「中英數社科健」六科的卷。

果間係屋邨小學，SYLLABUS不少，但由於學校喜歡10年都只係用3 份考試卷，考試內容年年都差不多，再加上當年小學教師只係中五，連BIO都未讀過都可以教「健康教育」。同學的質素普遍就係叻果D 小三就會轉校，咁樣開外掛都考唔全級5名內，其實可以去死。結果阿基只係全級第6名。

當面對一個夢想地產霸權的老母，玩完8年120%月薪供樓，仲想黎多一層。就已經知道佢係聰明女黎架喇。

Make the long to be short, 1995年佢就謀住想我俾家用，到2006年我月薪7K，佢就要求我俾4K家用。佢都係話「幫你儲住先，會用黎供基金供到2014年，你就可以讀一年大學。」但故仔梗係無咁簡單，由於我到今日都未死，即係有主角光環的情況下，故事有得發展落去。

Reference:

 https://www.edigest.hk/%e6%8a%95%e8%b3%87/%e5%ae%b6%e7%94%a8-%e4%b8%ad%e7%94%a2%e6%b8%af%e5%aa%bd-%e8%9b%80%e7%b1%b3%e5%a4%a7%e8%9f%b2-381111/10/